Cando na copia do xustificante da solicitude de identificación ou ben no propio DIE recibido, un titular adverta algún erro nos datos que consten neses documentos, debe solicitar o antes posible ao veterinario identificador a corrección deses erros. O veterinario identificador comunicará o antes posible a través de SIREGAL os datos a corrixir.

Determinados datos (microchip, especie e aptitude para consumo) requiren dun procedemento ou autorización especial polo cal nestes casos o veterinario debe solicitar a corrección por mail a siregal@siregal.org No caso de cambio de aptitude para consumo humano (solicitude de cambio de NON APTO a APTO), os Servizos Veterinarios Oficiais analizarán o motivo do erro e máis o prazo transcorrido desde a comunicación inicial dos datos iniciais de non aptitude e a data de solicitude da corrección destes , que non poderá ser superior a 10 días a partir da data de recepción do DIE polo propietario/titular, e concederá ou non o cambio no caso da aptitude segundo corresponda

Para comprobar se o DIE estaba xa emitido antes de realizar a corrección dos datos solicitada, vostede pode consultar os datos gravados polo veterinario mediante a opción Estado solicitude DIE. Na parte inferior consta, no caso de que o DIE xa fora emitido, a data de emisión deste ou ben o texto “Pendente” no caso contrario.

As posibilidades son dúas:

• Se a corrección de datos se realiza antes da emisión do DIE inicial, emitirase este cos datos xa corrixidos. Esta operación non implicará custe suplementario.
  
  
• Se o DIE xa fora emitido antes de que o veterinario realice a corrección de datos, emitirase outro novo DIE cos datos corrixidos que o veterinario entregará ao titular do équido contra entrega do DIE orixinal incorrecto. O Colexio de Veterinarios destruirá este DIE incorrecto. Esta reemisión do novo DIE implica un custo que lle será facturado ao veterinario identificador, quedando a criterio deste repercutir on non este custo ao titular. A folla de solicitude asinada polo titular permitirá comprobar se a causa da modificación de datos solicitada se debe a un erro na subministración de datos polo titular ao veterinario, ou ben se trata dun erro de gravación por parte deste.

A emisión dos DIE realizarase ao inicio dos días 1 e 16 de cada mes. Polo tanto o veterinario dispón ata eses días para corregir as solicitudes feitas durante os quince días anteriores.